high tea

今晚同舊同學慶祝生日，去左銅鑼灣邀月茶館食飯，其實係係網上搵野食見到介紹所以去試下，入到去，店面面積比想像中細，全店都好靜，跟住睇下d茶，有好多選擇，都幾特別，但係都幾貴，因為叫餐，每人都可以自選一種茶，但係限左係$90以下，丫... 原來都幾貴，一杯茶都可以賣呢個價，真係見識見識。
d野食都幾好食，不個6個人食，埋單要16xx，都幾貴，同介紹果個網頁講人均$101-$150相差幾遠，雖然幾貴，但係環境都幾好，店後去洗手間條路，唔係廚房而係一條小魚池，養左十幾條魚，格調都幾高。係就係幾貴，但係見識下呢d另類 high tea 都可以開下眼界o既

回想起昨日起身，見到有人用我 send 出去既電郵地址，竟然 copy 一次再 send 野比我個 list 既人，雖然內容都係一d攪笑野，但係有d比人偷用自己的 address book 既感覺，估唔到我個address book入面既人會咁做，感覺幾唔開心...

又生日

七月真係一個好多人生日既日子，昨晚參加舊同事生日會，結果玩到三點，今朝一早又去幫人影相，勁眼訓...
返屋企訓左一陣，夜少少再去舊同學補祝生日，哈哈...

低調生日

今日 D.S. 生日，雖然佢口口聲聲話自己低調處理生日，但係年年都攞假，哈哈！打完波去左食好野，諗住試下個「阿華田紅豆冰」會好正，點知... 又唔夠凍，杯野又無豆味，唉... 失望，不過炒聖子、倉魚同大蝦都好好食。

比人問我個遊記點，今個星期一定會攪好！

六合彩

今日六合彩開30周年金多寶，成45,000,000呀，所以特別去買左兩張電腦飛，一張比人，一張自己，結果頭奬無人中...

下期仲勁，成60,000,000，之前同個係馬會做既朋友講，佢話如果今日無人中，星期四就做死人... 唔知星期五又有無人中呢

藍天

天氣實在太好，以藍天為主題既行水塘出發！

見到一大堆馬騮，有騎有抱，好勁！

呢張被我選為主題相，哈哈！

再做運動

今日又再去打波，一個星期做兩次運動，都算唔錯，兩次都好熱，好似減肥咁

打完波再去食好野，今次第二次去增輝，西芹炒得好好食，d魚入口又清甜，正！
(不過今次d聖子差左少少，下次一係唔食，一食就一定要食返「聖子王」)

呢幾日真係幾熱，今晚一返到屋企終於落大雨...

做運動

好耐都無做運動，今日同舊同學打籃球，雖然只係打左一陣，但係都幾開心，下個星期再約過，哈哈... (因為對舊波鞋爛左，仲買左對新鞋，好好著)

星期日檔案

今日睇返兩節星期日檔案，一個係講「廸士尼樂園背後」，一個係講「阿咩吉場」。
睇完廸士尼果節，一方面提醒自己要點待人，一方面提醒自已要跳出，小心被人洗腦。
阿咩果個故事，其實之前都聽過相類似既事，總之人要正面，努力生活！哈哈...

月夜

今晚月色好好，特別影低。呢個係西面，所以好明顯可以知道而家係上弦月，從月球的圓缺可得知，而家大約係初八、九左右

決定

今日終於同老細講左唔轉部門，覺得對唔住新部門個老細，之前話想試，而家又反口。其實之前真係無諗過會係咁樣收場，不過，低線就係低線，如果定左低線之後，可以接受低過低線，咁樣低線己經收去意義，都係努力試下闖一闖，哈哈...

七月飯團

昨晚一班人去左布袋澳食飯，d野好好食，有講有笑都幾開心，好期待下次八月食團。見返d走左既同事都開心，希望今次去唔到既人下次去到啦...

今日去考左個測驗，自己寫野真係好差，不但字數不足，內容連自己都覺得不知所謂，真係要下下苦工，如果唔係遲d可能會變文盲。

中陷阱

最近部門比人投訴，雖然我地都成日比人投訴，但係今次就越攪越大，問左d同事發生左乜事，朝早問到既野竟然同收工前係唔同，結果比其他部門反問，真係無奈，結果聽朝又要再問過...

好彩老細醒起有疑點，突然之間覺得可能仲有d事有人無提過，令表面上同實際上有分別，聽日都係要小心d再問過

回歸八周年

今日回歸八周年紀念日，一早就係茶餐廳睇升旗，跟住訓左成日，睇新聞先知有回歸巡遊，浪費了觀賞及影相機會...

今晚仲睇左「頭文字D」，整體上都幾好，睇之前有人話睇過書既人話唔好，無睇過書既人話好，但係我都覺得幾好，改編都有心思，交代了不少東西，完結得也不錯，算得上是好片。