十一黃金週

今個星期真係做到心灰，上個星期就三號風球，下個星期就超級黃金週，d躉船就係咁要橋位，d船公司就係咁打電話黎追，d老闆就係咁問/閙，其他部門d人就係咁搵我地做野，係咪想我地死先... 完全做唔到野，今朝八點幾開個file做野，應該做45分鐘可以做完既野，結果要攪到成六點先send到比人

下風球的工作

今朝返去無耐，就聽到天文台已經取消所有風球，跟住就大伙兒打電話聯絡艇同船公司，但係我就無乜點幫手，因為要清返一個星期無做過既野，結果攪左成日，到五、六點先有間幫手，結果攪到成九點半先走...

不過都算好，叫做日間先下風球，如果係夜間，夜間就真係做到不似人形，仲要做完可能又要等第二日船公司改過曬d野，又要重頭做起

就係呢d躉船泊係避風塘唔靠泊碼頭，攪得無野可以做，但係又要積壓落去

SB-800
今日會出去幫人影相，出發之前終於幫我支燈影返張相

今朝一早約左人唔知醒，好彩都係遲左45分鐘，好耐都無打保齡，一打就打左四局，一百蚊都算唔係太貴，可以接受啦。
打完就食左個lunch，之後又打左半個鐘頭機，就趕去幫人影相，影相都用左支新燈好多，但係都係未太掌握到，要試多幾次先得

三號風球

今晚係呢個月最後一晚返B，亦都係第一次係躉船中心過三號風球，本來三號風球應該對大部份香港人黎講都係無影響，最多都係有小朋友讀幼兒園要早少少去接放學，但係對躉船黎講，原來三號風球既風力已經足夠令到大部份躉船靠泊不到碼頭，聽日一取消風球就大鑊...

原本仲想話呢個風球，風大雨不多，點知即刻聽到外面勁大雨聲。

話說呢個風既風力真係有返咁上下，成台岸吊都比風吹動，攪到有意外發生，兩部車損毁，仲有一個VIP既貨都損毁，真係多事之夜。

閃燈

星期二終於攞左兩張信用咭，可以實行我個買閃燈計劃，終於等到今日放假可以去買，出發之前既係上網睇下邊度平，邊支燈好啦，點知一睇就發現最近全球加價，一加加500，超灰，之前一日去過萬成問價都覺得有少少奇，點解好似加左300，原來真係加價，結果去到旺角，好有恒心咁問左大約十間舖頭，最平既行貨都要2730，結果都係去返萬成買，好貴... 2780大元，比之前貴左300，之後仲問阿店員，佢話佢地將新貨同舊貨混埋一齊賣，所以先賣呢個價，下個星期都有機會會加到3000，唉...

又放完假

好似無乜休息過就過左個中秋節，一早起身就同人食左個lunch，叫做補祝返個生日，跟住就去左玩card game，食埋個飯就成十一點，咁又完左一日，不過食飯個時講左好多健康野，聽到d朋友講練跑，覺得自己好唔健康，越聽越覺得自己無節制，所以都要跑返步，仲想去學游水

今朝起身仲要牙痛加眼痛，可能又係因為訓得唔夠，感冒又未清曬，睇黎都係要休息多d，做返多d運動先得

中秋節快樂

祝所有朋友中秋節快樂！

昨天一收工就去左舊同學屋企玩通頂，朝早先返屋企訓，原本仲諗住11點去打波，結果都係無去，仲要勁攰咁去左剪頭髮，之後仲要返工，所以今晚一定要訓返夠本

今日收到個舊朋友既sms，之前因為唔見左電話，所以無聯絡(件事好似上個星期都發生過，不過係我send sms比人)，節日都幾好，可以聯絡返d舊同學、舊朋友

迎月再前一晚

今晚係迎月前一晚，天文台話迎月同中秋天氣都唔係太好，叫市民今晚賞月，咁就要趁天氣好幫個天影返兩張相先喇，時間仲早，只係影到兩粒星，夜少少再試下

上堂

今晚第一次上返一d活動形式既堂，都幾開心，同學都好活躍，有講有笑，雖然得到既野唔係好實在，但係輕輕鬆鬆咁同人吹下水，聽下d所謂分析都幾好

諗返今朝，真係唔係好想返工，起身個人忽冷忽熱，洗完臉走出洗手間，塊臉又即刻出汗出到濕曬，就死咁滯，而家叫做好少少，唔知聽日點

打波

三個星期都無打過波，今日終於放低曬d野走左去打波，但係自己又感冒，打左個零鐘之後就頭暈，結果都係打唔得耐，下個星期又要返b，又要等多兩個星期先有得打

生日

今日一開icq，竟然發現有兩個人都係兩日後(9月15日)生日，連一個無提示既，即係竟然有3個我識既人係9月15日生日，識咁少人都可以有三個同一日，真係奇怪...

休息

原本諗住星期日都做少少公司野，所以昨天收工都拎左少少野返屋企，點知留左係朋友屋企，哈哈，結果真係可以休息返一整日，hea足全日，將好想睇既戲睇完，又睇多幾套漫畫，訓足十一個鐘，好耐都無試過咁休息，聽日又有能量做過

開會

今日返工要開一個好長既會，成個下午都無左，點知去到開會，人地一心諗住講system，我地就諗住講操作，結果去到只係坐，完全唔關我事，我地d野要另約下個星期再開會講，唉...

今日有朋友生日，send左個sms比佢，結果比佢問返轉頭我係邊個添，哈哈... 都幾「淤」

飯局

昨晚洗濕左個頭，結果一不做，二不休就去打埋份minutes先訓，攪到成點半，訓五個鐘又要起身做過野，超勁攰
一返到去，收到大老闆助手通知，今晚個判頭飯局叫埋我去，大鑊啦，原本想返屋企死訓，結果又唔得
今日下午有個會，由另外一位同事跟開，雖然佢前日已經叫我去，但係實在太多野要跟，我話唔去，佢就係咁叫我去，結果我都係無去，跟住佢又好似發脾氣咁，一於好少埋，我自已d會都唔迫佢去啦，佢個d會就叫我一齊去，咁我自已d野都唔知幾時可以做，最錯既就係一開始可能唔夠決絶咁話唔去，又學左野

低調生日食好野

昨日有好朋友生日，正日只可以食lunch，今晚終於可以食好野補祝，原本諗住三點半去到船公司開會，三個鐘乜都夠，七點食一定無問題啦，點知... 一開就開到八點，唉... 開完會仲要搵唔到西隧巴士，結果搵左成四個字，先搭地鐵去深水埗食好野，攪到成班人等我一個等到成八點十，勁唔好意思。不過今次有大大隻鮑魚食，一口要食好耐先食完，勁！

才華與表現

今日同個舊同學食飯，講開我地果班d女同學比男同學叻，已經有幾個係高級人仕，反觀自己仲係一個草根階層，做野又要吃力不討好
有時間都係要做返d有意義既野，唔好咁浪費時間先得

邵逸夫奬

今日下午去左科大聽邵逸夫奬天文學奬得主演講，今次係兩位教授共同得奬，先講的教授口音及方式比較難明，第二位就風趣得多了，但係都係有好多都聽唔明，只係大概明少少野

原本諗住一起身就可以整理返最近影既相，點知一睇返d電郵(開電腦第一樣做既野)，見到大老闆叫我準備d野比佢星期一開會，結果自己希望係佢走12點前比佢，如是者就係咪問、係咁打左d野比佢，後尾又見到之前仲欠佢少少野，結果又要做埋，攪到無時間做其他野，連個天文演講都差d遲左去，又準備唔到文件，唔可以一次過去科大買電腦

放鬆自己

今日一早就同人嘈，真係唔好彩，又好多好多野未做，枱頭開始失控，好多野都做唔切，原本最近都已經多野做，阿頭走埋仲衰多兩錢重，結果都唔算好遲走 - 八點，其實真係應該做埋d野先走，但係今個星期實在太攰，再唔休息多d就快頂唔順

都算係咁，係困苦中仲可以講下笑，比人問死得未，就彈左句「人終需要勇敢生存」黎答人地，真係中到連自己都忍唔住笑左出黎。跟住今晚同人吹開水，原來第二個部門今日又有人走，仲要有句「我只想身體健康」係辭職信度，又係要好中，好感慨，仲要多我成廿幾年既經驗同感情，其實佢都係一個好人，可惜係死亡更之下促使個人太攰太勞苦，更可惜既係，點解仲有d部門可以咁悠閒

聽日調左假，可以去聽天文野，都好耐無聽囉