貓巴士

今日竟然收左架貓巴士
雖然唔肯定係乜野歌


星期六去左南生圍影既相終於整好
http://picasaweb.google.com/mmcity/061007NamSangWaiPhotos

追月

訓左四個鐘就去左南生圍影相
感覺無特別
唔會點建議人地去
如果想影景(湖、天、草)
去濕地公園好d
如果想影雀
聽人講米埔會好(雖然南生圍都算近影雀地方)



行到一點半左右先到巴士站
好急咁帶住訓左四個鐘同行左一朝既身體
返一返晊企又再出發去海洋公園

今次係第一次去哈佬喂
去左太凶異域、荒廢校園、血獄地府、吸血殭屍舞會、猛鬼衙門
只係去唔到幽靈焚化場
感覺果幾個鬼屋既排隊時間都幾長
但係屋入面既時間好短下
值唔值就睇唔同既人
仲玩左跳樓機
感覺上上次去韓國果個好玩d
整體上都算幾好


返到屋企都成一點幾
都係影埋個追月先

中秋

(終於有時間寫返之前d野)
今日中午人地老闆請食飯
去左陶源酒家食個中式套餐
不過好似都幾貴

原本收工約人去買相機遙控
但係朝早屋企人先話成中秋飯
所以五點好準時就返屋企
去左觀塘廣場一品香食上海野
好食又好抵

出到去好急咁去睇遙控
點知發現部機一撥去遙控mode就無b快門選
上次問人都好似話得
都係要問多次先得

之後去左打機同睇書
所以無係屋企影月亮
改左係旺角街頭影

睇相

今日收工去左睇人地d相
歐洲既風影都好靚
不過有d國家好似多數都唔好天
去果時要碰碰運氣

今晚追月
月亮光度又強左
所以要呢張 - 1/125s, F8, ISO200

夾時間

想去個短線旅行都好難
兩個人既時間都好難夾下
九月講到十月
十月又要改到十一月
而家可能要改到十一月底
真係希望個training滿曬
咁就可以十一月上旬去到 .."

家姐部電腦又死
都唔知係底板定harddisk有事
今晚買個新harddisk返去諗住一定得
點知隻牛又無SATA power out
又要再去買線...

今晚個月亮又圓多左d
仲要夜左
影左幾張都係覺得少少under先睇到多少少details
結果係... 1/60s, F8, ISO200

第一天

十月既第一天工作日
唔洗打卡既感覺實在太好
中午仲有人請食飯
叫左勁多野又食剩好多野
下午仲有冰皮月餅食
不過就因為要執埋以前個位
攪到遲左先走得

今晚個天頂幾清
影左月亮相...

國慶假期

趁住國慶假期
一班人返左大陸玩兩日兩夜
差唔多乜都無做過
只係返去食同訓
玩都好少玩
不過最唔好就係攪到人地無得訓
都係自已太執著一d唔應該執著既人同事

軒友飯

今晚同朋友食飯
原本真係唔知每個人點諗
個個都好似怕好多人唔好咁
都係叫佢地想去就去
結果都有8+2個人食
都幾好
主角仲比人「整」左野
影埋相今次一定有排講
哈哈...

今日中午原本諗住同班同事一齊食飯盒
但係之前都無同oic食過飯
結果都係做衰仔自己走左去食飯
仲有兩日
但係仲有好多野要做...

小組飯

今晚去食gang3小組飯
上次因為腸胃炎所以去唔到gang2果個
原來連大大佬都有去上次果個
今次都有小風波
有個不太受歡迎既人今日話去
但係最後都臨時唔去
見其他同事不斷咁幫佢改花名都幾攪笑
不過點都好
都係過多三日就唔會再對住呢個吃力不討好既地方

今日公司仲發生左一件幾大件事既野
件事大到係有機會出唔只一張warning
更嚴重可以係有人事變動
但係... 其實都係一個遲早發生既事
作風同處事手法真係需要改變一下

小聚

今晚約左個差唔多成年無見既朋友食飯
吹左一個鐘左右
佢真係上進好多
性格上真係幾唔同
但係都好講得埋
但係竟然都話想開報紙檔
同我爭飯食
哈哈

九月廿三

唔經唔覺昨天又係九月廿三
咁又o係公司過左一年
原本諗住搵以前個阿頭食餐飯
結果又搵佢唔到
聽日返去搵下老闆秘書食飯先

今日同班朋友玩settler
仲有五星期咋
努力！
http://www.boardgamegeek.com/game/13

充實的一天

今朝八點半就起身去左游水
游左一陣已經覺得好攰
大慨係體能仲未完全回復

跟住約左朋友去玩三國志大戰
不過勁輸又無特別卡...

玩完食完野之後就返工
點知返到去見到勁多人返工
想搵個位坐都無
攪到要去飯堂坐
但係之後又有好多野要做
攪到又要成八點半先可以食飯

收工仲同班同事去咖啡灣燒野食
佢地買左勁多海鮮去燒
仲叫左個船公司既人去
有成十二個人燒
結果比我想像中遲走
返到屋企己經四點九...
都幾攰，哈哈...

哈勃太空望遠鏡

今晚終於睇到「哈勃」
可以係佢十一月落之前睇都好


今日終於聯絡到個朋友
聽落都幾辛苦
可幸都算樂觀
希望時間快d過去
佢快d好返

聽晚開始又返b
可以搵下料去旅行
哈哈...

放假

今個星期因為腸胃炎關係
差唔多日日都返屋企食飯
比平時留係屋企既時間應該「多」左三倍
不過好多時間都係訓覺
感覺好似放左一個星期假咁

昨日有朋友打黎話去唱k
結果去左剛開但係仲未裝修好既瓊華neway
間房竟然有三個電視同四支無線咪
都幾好喎


今日仲去左幫手影相
好耐都無影過野
仲見到三間電視台既錄影隊

仲有半個月

今日已經十五號
仲有半個月就「可能」會參加一個兩年既培訓
雖然未收到正式通知
但周圍既人比我仲早覺得已經落實
點都好
係而家呢個小組已經年半
雖然唔係話好有感情
但係可以睇到既野有好多
面對既人都好唔同
雖然得到既都唔係一d對resume好有用既野
但係對自己既眼界黎講都唔錯

再一次

昨晚諗住早d訓
但係訓訓下就要起身
要再去睇醫生
又係急性腸胃炎
四個鐘疴左六次
疴到有少少脫水
結果攪到今日要攞假...

冬眠

今晚都係選擇冬眠
要快少少好返先可以去探病

真係覺得自己無盡力
如果唔係就可以去睇戲同整個好少少既blog

今日發現黑玉子唔見左條毛巾！！！

美食團

週未又去左大陸食野
今次去左「忍者居」食鐵板燒放題
食到一個個殼好軟既蟹


第二日個晚餐仲豐富
去左「創鮮」食自助餐
好多野都好好食
值得推介！
最令人難忘既係個湯

閏七月十五

今晚係閏七月十五
如果唔係閏月已經係八月十五

落街見到個月亮又圓又大
不過理論上要到十二點個月亮先到頭頂
屋企向西
要到成點先可以影到...
都係訓多d算數

平靜

今晚去左同朋友食飯
大家都好似無發生任何事咁
吹下水玩下magic
盡量輕輕鬆鬆咁玩
七個星期既時間
一定要輕鬆去面對

個感冒都幾重
成日坐左係位都唔知做過乜
真係想攞日大假想息下

電視劇情

昨晚十二點幾收到個好友既電話
原來有人得左重病
今日收到既消息更加突然
完全唔覺得會係現實中發生既事
上個星期先食完生日飯睇完戲
今日竟然係咁
心情沉左一沉...

今日去左順發食生日飯
個粥同個湯都好好味

又係華碩

今次又比華碩玩
上次係CD-rom
今次係底板
呢個係我繼samsung後
又一個唔鐘意既電腦品牌
可惡的ASUS A7V8X-X

http://www.asus.com/products4.aspx?l1=3&l2=13&l3=62&model=227&modelmenu=1

生日飯

最近真係比較多人生日
今晚同人食生日飯
可以以低價買到想買黎玩下既filter
遲d可以試下玩人造藍天同日落
加上又係星期二
可以睇平既death note
套戲比我想像中好
但係就夜左少少
哈哈...

電腦展

今日去左電腦展
比起上年感覺上多人好多
有時想行都行唔到
見到部Kodak V570只係賣2390仲送1GB卡
又諗起家姐想買部相機
問完佢就幫佢買左部機
又細又係黑色感覺幾好
http://www.dcresource.com/reviews/kodak/v570-review/index.shtml

王力宏蓋世英雄演唱會

今晚去左睇王力宏演唱會
對上果次去睇演唱會都超過五年
雖然有好多王力宏既歌都唔係好熟
但係現場氣氛好好
多才多藝既佢表演左好多樂器
有電子琴、結他、鋼琴、鼓、小提琴、二胡
感覺都幾好

太空館

今朝去左游水
感覺上都係唔係好夠能力
想游一個直池都唔係好夠氣

之後去左太空館睇野
原本睇天象節目-「哈勃太空望遠鏡」
但係因為時間唔啱
所以睇左全天域電影-「極速挑戰」
好耐都無睇過太空館既野
都算唔錯


http://www.lcsd.gov.hk/CE/Museum/Space/Programs/c_index.htm

再見了！冥王星！

今晚返收工果時聽到個新聞
International Astronomical Union (IAU) 己經開會決定
最近討論得好利害既第十、十一、十二行星
全部都唔會算做太陽系行星
連冥王星都要從九大行星中除名
即係以前細細個就學既太陽係有九大行星
最遠最細個粒冥王星
以後都唔再算係我地既行星
以後我地只可以叫被發現左76年既冥王星做矮星
以後要記既只係得八大行星
感覺就好似話比我知
彩虹唔係有七種顏色...
http://www.timesonline.co.uk/article/0,,3-2327187,00.html

又返B

今個星期又返B
可以好好咁休息返一個星期
不過最慘就係今晚無得去食雪糕...

昨天又去左游水
兩個星期無游
游個時己經好似唔係好識游
體力又未恢復曬
都係星期尾再去游過

昨晚同幾個同事去食宵夜
比我想像中少人
全部都係牛魔王
結果我都只係食左一碟餃同一碟菜 .."

YICT宿舍之旅

(寫返前幾日既野先)

因為想留假期去旅行
所以調左聽日要返工
之前去camp果日就放假
結果因為去完camp勁攰
所以都係攞左日大假

今日收工返左大陸
最主要係去YICT個員工宿舍到睇下

當然會去食好野
第一晚食「小肥羊」
跟住仲同人打牌到成四點(同以想法一樣，唔係好好玩 ..")
第二日中午食「中森名菜」

返到香港仲去左美食博覽
玩到超勁攰返屋企已經成十二點幾...前

CCK O'Camp 2006

今年輝仔再叫參加中學既O'Camp
其實之前果幾年都想參與下
大慨又係關我既「好似乜都唔熱衷」感覺有關...

其實籌備果時比較難就
佢地大多數都係日間開會
都唔記得點解可以參與到佢地第一次選人
仲可以參與到一次pre-game同開會已經好好
跟住d會就全部去唔到
d野都唔係好知佢地攪成點
留言比佢地又好似無乜人理
結果無乜貢獻就到左O'camp
被編帶組都無乜所謂:)

到左O'camp先發現
原來唔知佢地攪成點既唔只我一個
都係盡力帶返好自已個小組
原本預計會好多地方over-run
實際上當然有但係已經比想像中少

我個組既失敗都幾多(走錯路、遲大到、收左佢地既車軚)
玩「城市追踪」好無奈咁同佢地一齊四圍走寃枉路
玩「陸上競技」三個有兩個都完成唔到
玩「原野烹飪」又無乜野可以食到
希望佢他係呢個可以容許出錯既camp試多d逆境
希望佢地可以體會多d、深d
睇到佢地每個game都有少少改進都算唔錯
記得幾多就好睇佢地自己

講返班師弟妹
之前d minutes勁少野
第一晚個e會好亂
有人講左無人jot野之後都仲係無人寫
去camp呢兩日睇到佢地真係仲要比d心機去學同體會
除左經驗仲要練多d自信、表達能力同控制場面能力

6800萬

歷來第二大彩池既六合彩
我亦都落重注 - $40
結果... 中左好多個字
不過分開左幾條
最多果條三個字... $20

昨晚去左沙田補祝朋友生日
有人好有心思咁帶左即影即有相機
仲買左相架做生日禮物
咁我地就即時影同入左相先送
好特別

星星

今晚刷完牙見到天氣好清
即刻拎相機影相
點知拎完就多左好多雲


真係變得快
但係都影左一、兩張
都有好多星呀！
可以考考眼力
睇下見到幾多星


可能見到d星好似一條條咁
比多少少資料
F3.8
30s
哈哈...

(想寫返d camp既野，但係太眼訓，聽日先寫)

食飯

今晚補食生日飯
跟住一班人上左飛鵝山睇夜景
天氣勁清，可以好清楚咁見到夏季大三角
可惜無腳架同有b快門既機
所以只可以記住個景
影唔到星


跟住仲玩埋電筒字
都係果句
無手動機影唔到好多野


今日返到去終於好返少少
backlog回復返以前peak既水平
雖然都係要等
但係等既時間由3日變成日半
感覺好左少少

又打風

呢段係昨晚既野
當想post既時候
幾下閃電就奪去左我既連線
到今晚先post返...
=====================================
今日又好怱忙咁五點走左
食完野就去左整牙
花左$6600 + 一個星期食野唔自在
換返黎既牙橋終於可以用
比起上個星期今次整快左好多
唔洗一個鐘就走得
個醫生仲叫我諗下買洗牙機
咁就唔洗成日用牙線
仲可以乾淨d
感覺好似病人要用洗x機咁...

上星期個風影響到大船船期
攪到大船都唔夠位要等幾個鐘
躉船更加要等幾日
d大船攪掂之後
佢地就不斷話躉船等得耐
客人大曬...

888香港熄燈

今晚係888香港熄燈
原本諗住可以留係屋企感受下第一次咁既「盛事」
點知八點仲係地鐵九龍灣站
望出去都真係有好多家居熄左燈
但係去到八點二
見到仲係好多燈都未開囉...

不過有好多商廈都唔參與
特別係維港兩邊
所以個感覺都唔係好強
(雖然都有好多討論)

影相

好耐都無去影相
昨晚其實已經想去
但係都係因為太懶
今晚食完個tea
就去左尖沙咀海港城個停車場影
可惜無帶支12-24 (因為覺得天氣唔好)

















今日去朗豪酒店食tea buffet
去果時點朗豪坊有S.H.E.簽唱show
結果比人群迫走左
要走個大圈先可以過去
呢個就係當其時既場面

仲有十日

今日問返上年個ocamp既野
聽落下都幾得意
但係都仲係覺得學校風氣無變
d學生都係唔夠自信同唔夠全面
距離個camp仲有十日咋
今次可以落玩
重拾玩camp既感覺
yeah!

問野之前去左睇書
終於買左想買成兩個星期既「交換鏡頭年鑑2006」
寫d野都好似好有用

三號風球

今朝一返去就做衰人
問曬全世界要兩個人ot
個個都話唔得
跟住就放風話要抽籤
結果佢地都做到比平時多好多既野
一個都唔洗ot
大團圓結局

個風原本話一定唔到香港
點知兩點就有打風會
結果四點幾就掛左三號風
跟住就有意外
又要問駁船既艇黎唔黎
又要問d艇會唔會去避風
但係都係五點幾就即走
約左牙醫要車牙做牙橋

原來要整好耐o架
攪左成個半鐘先走就
而家d麻痺藥仲未散
都唔知今晚會唔會痛到訓唔到

轉生

星期日reg左個no-ip既DDNS
今日終於都download返個update client
咁樣，我個web page同ftp都可以重生喇
不過由原本既myDDNS改左做myvnc
打少一個英文字母
但係我意思就... 怪怪地
話曬我而家都唔係點用VNC
都係果句 - 網名黎o者

試食

今晚第一次去九龍公園游水
初時只係開放室外池
好似動物園d猩猩咁比人睇住游
好彩後來開返室內個主池
感覺好好多
唔會好似觀塘個池咁咸同咁重綠氣味

返到屋企就有得食家姐既朱古力撻
同佢影左張相


一咬落去...
好似食緊朱古力漿
哈哈...

聚餐

今晚同里奧補祝生日，幾個人係咁吹水，雖然追更攪到個人都幾攰，但係係度天南地北都講得好開心，聽到問人攞員工編號、為興趣轉工、學生勁串都講得好攪笑，食完一度再去第二度食，最後仲想去飲野，不過都係有d夜，下次再約過

最後一朝B

因為有朋友生日，所以星期六調返早，所以今朝係最後一朝唔洗早起身返工，今個星期又無去游過水，今朝就去左游，但係一起身感覺好攰，可能昨晚太夜訓，仲有少少酒氣就去左游水，感覺就好似係個泳池到去酒氣，哈哈... 不過唔係好游到，游左一個鐘就走左

吹水

今晚收工同d觀塘同事去左食宵夜、吹水都幾開心，仲講下公司d人事野，唔經唔覺就成一點九先走

當人生到低朝時，人都好似總會失去某東西，總要努力起返身，究竟人生係唔係總會有低潮？

返B

今日終於可以返B，因為之前要學游水，攪到之前果d返B既星期都只係返一、兩日B，感覺上好似好耐都無返過B，今朝起身就可以執下自己張枱，之前實在係太亂啦，而家個感覺好好多！

呢幾日既日頭都已經有野想做，可能係因為太耐無返過B，所以好多野都積左係今日星期做，仲想去游個早水，仲要執下屋，整返好部電腦...

大暑

今日一朝早就去左游水，未落水己經覺得好曬，落左水都覺得好曬，游完水就已經覺得自己黑左好多，跟住返屋企先知道原來今日係大暑...

游完水又去左唱k，唱完k終於去左買電話，原本都諗住買TS30，但係黑色又成日都無貨，結果走去買左另一部機 - Z550i
http://www.sonyericsson.com/spg.jsp?cc=hk&lc=en&ver=4000&template=pp1_loader&php=php1_10459&zone=pp&lm=pp1&pid=10459

超人

今晚去左睇超人
唔知係唔係我唔慣
套戲唔係普通既悶
真係越睇越想訓...

今朝返到公司
當值既同事攞病假
原本都預左今日要做返d野
結果又係乜都無做過就到六點走人

睇星

今晚返左科大游水，唔夠訓發覺自己越游越差，都只係游左兩次50米就玩完，下次再玩過

走果時又望下個天，雖然好多雲，但係都已經見到夏季大三角，都係覺得天鷹座既牛郎同天鵝座天津四最易認，咁就好自然咁搵到織女啦，真係好想再去下睇星，如果部相機可以影埋星流跡就更加正，可惜竟然無一條shuttler繩啱部機用...

按章工作

今朝幫手pick左個電話，竟然比人問野，唔知就好自然咁問其他人，點知又個個都唔知，結果比阿頭出mail話唔好乜都話唔知，之前老闆出左mail，其實無人提過，老闆又只係forward左大老闆既mail，仲要只係提左一句無關重要既野，攪到個個都忽略左大老闆既重點... 點知「馬後炮」仲要加多句「出曬mail架喎」，真係... 個人又攰，乜都唔想理，下午就開始等走，夠鐘即走

約個friend去食飯，睇到ts30出左黑色靚好多！睇左幾間，諗住最抵都係有員工折扣果間，不過無現貨，跟住去左睇mirco-sd，睇完諗住走，點知落雨所以去左無乜野買既連鎖店，點知比我地發現左竟然係最平！不過都係無現貨，結果留底左個電話等sale覆，哈哈...

50米

今朝去左練水，第一次可以一次過游一個直池，終於可以叫做識少少識水
但係d自由式、背泳呀就完全唔得
都係要努力繼續

無奈的一天

今日一返去就搵料睇下點覆人
點知勁多支折，根本好似無做過野咁
搵到d料，十一點半就比人叫左去解釋
講唔到幾句就比人叫走再去搵料
攪到一點幾就再去解釋
又係比人罵...
結果反反覆覆
到五點半先有野食...
仲要成日無做過野
勁無奈

原本今晚諗住去練下氣
但係攪到夜左先走到
星期日又唔知會唔會閃電落唔到水
希望唔好咁早閃電啦

精神轟炸

今日己經係連續第四日好多野積落黎做唔切，情況越黎越差，亦都見唔到過幾日會有乜野起色，仲要好似越黎越差，d客既態度一日比一日差，咁樣落下都唔係辦法...

今日十點幾然聽到個好勁既消息 - 有架車跌左落海！！！個車主仲要係識既，不過好彩佢仲係地面，只不過佢都唔知點解架車會落左海，結果攪到成班人係呢個勁多野做既時刻更加多野做...

lunch仲同個好耐無見既同事食飯，升左識請食野，遲d仲可以食多餐勁d既！

休息

今朝起身竟然再訓過，好彩有人叫醒我
返到去都係勁眼訓
所以今日都選擇左早d返屋企訓餐勁既

昨晚去左游水
終於都開始習慣個水深
跟住就要練氣同耐力
仲有個練極都唔好既自由式

Ocamp

今晚去左join個ocamp會，一開就開左三個幾鐘，不過都見到班師弟幾比心機做，只不過少左d經驗，希望佢地可以攪得好又學到多d野啦

昨晚去左唱k，好耐都無去，見到周圍無乜人都趕我地走，好彩後來問一問，可以遲一個鐘成十點半走，哈哈... 不過都好貴，可能係因為世界盃，所以每人都要成二百幾

感冒第三日，情況都無特別好轉，都係要訓多d先得

二十堂

今晚係最後一晚學游水
無再繼續報名學(只有一個同學繼續跟阿sir練)
最主要係想比d時間自己練好學左既野
練好完應該可以再學好d
同一班續學左一次既同學一齊約左阿sir食飯
吹水都吹得幾開心
仲約埋以後可以一齊去游或者去玩

再見Smartone

用左成五年以上既smartone，用埋今晚就唔用，雖然係因為新世界個價錢吸引好多，但係話曬都用左咁耐，個service都唔差，但係就真係留唔到一d低用量既人...
不過諗返轉頭，我個電話號碼都係係新世界出，不過之後覺得extra好d，所以先轉過去，跟住extra個brand都無左，而家其實應該叫轉返轉頭o者

日落、打撈

昨天去左青衣影日落，差唔多成五點先到青衣自然徑，但係都仲係好熱，太陽仲係好高，第一次去影青馬橋，仲可以影日落，雖然熱d都算啦，個天都幾清，但係條青馬橋都唔係好清...



影完之後去左睇波，英格蘭對葡萄牙，結果竟然又係和，估唔到有「球星」被人趕出場，趕完之後就諗，英格蘭雖然踼得好，但係主力傷的傷、好返既又被趕出場，下一場仲有得打？所以...

今朝又走左去游水，練練下就去試下游一個直池1.3-3.8m深，竟然跌左條鑰匙落三米既池底，大鑊！！！咁叫救生員睇下有無野可以撈返起佢，跟住佢話個同事去左食飯，等下先，竟然有位人兄話可以幫我落去攞返，跟住佢就去左沖身(因為之前塗左太陽油)，與此同時，有個小朋友(大約十歲)話試下幫我執，又真係幫我執左上黎，當時個感覺就好似功夫裏面成村人都識功夫咁... 沖完身個位人兄，跟住仲教我點樣可以落到池底，下次可以自己試下，試左幾次，真係落到池底，咁又學多樣野，哈哈... 佢仲指點埋我d蛙腳，真係出門遇貴人。

食飯

今朝竟然比人搵到個email，sent左個email過黎，原來佢係做AM既，不過今朝一睇個list，有成六七個AM...

今晚同個朋友食飯當慶祝生日，竟然去左三個地方食野，勁！吹左好耐水，又講下大家最近點，又講下去邊度玩，感覺好輕鬆。不過聽日要返工，最近又好攰，所以都要開聲叫走...

聽到個去左YICT既同事開始要返夜，返足三個星期仲要唔係休星期六日，超慘，真係越黎越少時間見到佢囉

之前唔記得左放個 web album 條 link 出黎，補返先：
http://picasaweb.google.com/mmcity

新相簿

今日趕住收工返屋企再去學游水，返到屋企竟然見到等左一個星期既 Picasa Web Album 終於批左可以用，好開心咁upload左d相上去，又可以繼續用google既簡約野，而家都用緊email、blog、相片管理同相簿

今日一落水就覺得好攰，阿sir都講過下背泳既手，但係一用手就潛水，完全唔知點游，下次要努力再試，上完堂自己練個時，同個同學講開做野，原來佢竟然係船公司做，平時仲會打電話去我地果度添，原來世界真係咁細，同佢吹水吹左成九個字，浸左勁耐...

又影相

繼上個星期去左濕地公園影相，今日星期再跟人去攝影班外影影相，今次又係$45加$25影model，其實都唔算貴，坊間果d多數都要過百，今次又係上次果個model，不過今次好好陽光，個個都大汗疊細汗，不過都影得好開心，放幾張相係度分享下先

學新野

今晚終於知道點解個蛙式好似潛水咁，吸完氣就沉到落底，仲學左背泳既基本功，可以望面個天唔沉咁呼吸，呢個係繼踩水後又一個好有用既野，可以好放心咁換氣，唔洗係水度仲個頭出黎先可以換氣

食飯

今日同三個舊同事食午飯，講開最近做得好慘，跟住佢地即刻話佢地果度請人，不過待遇一定無而家間公司咁多，其實都有d心動，但係諗返清楚，如果要轉工，都係轉行比較好，一來呢行都試左差不多四年，可以試下d唔同既野，二來自己唔會成日比較而家份工，輕鬆d
加上最近老闆話個plan會改到出年一月先行，更加令到我覺得好似等完又等，年頭等年中，年中又要等到出年年頭，都係努力d搵工

濕地公園

今日去左濕地公園，去到果時比我想像中少人，個天都幾好，點知越行越多人，越行越熱，影左個幾鐘就返去室內睇一睇野，跟住再出去影過，果時就好多人，又落雨，結果影多幾張就走左，下次無咁熱既時候可以再去多一次
今次見唔到好多雀，可能時間唔啱啦，不過都影到好天、蜻蜓、招潮蟹、白鷺、蓮花同好多植物

食好野

今日果兩個IVE學生最後一日返黎，但係下午要返大陸present，同唔到佢地食飯，呢兩日都諗過同佢地出去yard走一轉，叫做睇多少少碼頭野，但係咁啱呢兩日都有好多無謂野要做，結果佢地last day都無點同佢地講過野，都真係幾無緣，佢地黎果日我又放假，last果日我都唔係度

今日個presnt真係好無謂，無ex-co黎聽，d人又勁over-run，聽果d人又唔留心，一團糟！不過完左之後，去左大角咀街市食好野，都幾好，d雞同d菜都好鮮，個三寶仲勁，竟然有紅椒，真係唔係好多人食得落，食完成頭汗，勁！

估唔到去街市食飯都有波睇，睇左半場阿根廷，入左三球波，都好好睇

又練

今晚都係練踩水，練足九個字，練到上水果時有少少抽筋，拉完筋再去練蛙式同自由式，都仲係唔係好識游，最多都係游得果25米左右就要停一停，自由式仲差，20米都未必到，要努力繼續練...

聽日又要去大陸，今晚仲要練多少少，如果唔係聽日講野講到一舊舊就丟面，估唔到都係要我講，果班人都唔知做乜，COM成班吹水人都唔出去講，搵黎攪

追更

今日無辜地要返b更，所以聽朝又要追更返早，下次真係唔可以咁樣幫人頂更

昨晚學左踩水，都幾得意，不過隻腳勁攰，唔可以頂好耐，所以都係要練多d先得

Saturday in Friday

昨晚去左friday食飯，叫做補祝三個係五月生日既舊同學既生日，一齊邊食邊睇波，開波既時候，有個人走埋黎叫我地估賽果，咁緊係估英格蘭啦，跟住個friend就填2比1，踼完之後，抽奬完全聽唔到，心諗得果1比0，無我地份，但係過左幾個字，有個人走黎同我地講我地果枱抽中左，可以全單六折，跟住仲同我地講
.
.
.
「唔洗寫比數o架」

個banner寫錯字喎

買鏡

今日去左買鏡，終於有支wide angle，仲係原廠，見到都好開心，但係返到屋企試鏡果陣，發現支鏡變形都幾勁，d相好似被拉向四隻角咁變形法，有時間要試多d先得
買鏡去左雷射，因為係最平既現金價，仲送左件CAT風褸比我，之後仲去左永成買CPL，大出血咁先返屋企試鏡

黑仔

今日超黑仔
朝早一上公司車，竟然無冷氣，果架密封既旅遊巴，只係開左果兩個勁細既天窗，最近仲要好潮濕，加上架車差唔多坐滿人，車內溫度極高，濕度都應該過百份之九十，落車果時成個人濕曬...

返到去要清左積左幾日既email，做appraisal就比人叫做個無乜可能做到既project。跟住就比客打電話黎噪，罵完仲話我地做野唔好，跟住車輪戰咁打黎煩我地，仲話要投訴，勁嬲。跟住比人捉去開會，問點解d野壓咁耐，又問左幾個成效唔大既問題，咁就成朝...

食完飯就去開會，成個會都只係得個講字，開到成五點幾就話分工返去做。返到位又要覆人電話，結果成七點先走得，結果搭車返屋企又要無散紙，比張一百蚊佢，佢找返九個十蚊銀同一個兩蚊比我...

今日都算好黑，勁多唔如意既野，都係要睇返三期行運超人先得

上堂

連續兩日既堂終於上完，有好多case study同討論，感覺都幾好，有take away，但係如果問我既話，我覺得$8000唔係好值，不過總算話叫做上過d咁貴既堂...

端午節

今日端午節，無去影龍舟，反而去左睇達文西，整體都唔錯，不過為左掙野走去打生打死，死咁多人真係慘d

見端午節，沖個凍水涼，個人精神曬，睇note...
.."

智能身份証

今日終於去左攪智能身份証，張相原來影側左，不過唔緊要啦，自己既野睇極都係咁，哈哈...
(仲幫自己張舊身份証影左張相)

Quiz

今日做左個test，又一次証明左朋友既一句說話
「show唔到好想做」
其實... 可能係「乜都唔係好熱衷」
哈哈...

You scored as Physics/Engineering. Related majors that match your highest scored category: Architecture, Astronomy, Astrophysics, Biochemistry, Chemical Engineering, Chemistry, Civil Engineering, Computer Engineering, Computer/Management Information Systems (CIS/MIS), Computer Science, Electrical Engineering, Environmental Science, Genetics, Geology, Industrial Engineering, Mathematics, Mechanical Engineering, Pharmacy, Physics, Pre-Med, Psychology, Statistics. Consider all majors in your OTHER high scoring categories. The right major for you will be something 1) you love and enjoy and 2) are really great at it. Consider adding a minor or double majoring. Please post your results in your myspace/blog/journal. Physics/Engineering 81% Biology/Chemistry/Geology 69% Psychology/Sociology 63% Nursing/AthleticTraining 63% Education/Counseling 63% Visual&PerformingArts 50% HR/BusinessManagement 50% PoliticalScience/Philosophy 44% Accounting/Finance/Econ 44% History/Anthropology 44% English/Journalism/Comm 44% French/German/Spanish 38% Mathematics/Statistics 25% Religion/Theology 25% WHAT MAJOR IS RIGHT FOR YOU? created with QuizFarm.com

超攰

話說星期四晚食完飯，返屋企都睇左一陣功課，但係個人好攰，都係訓左跟住第二朝早d起身做，六點半就起身做左個幾鐘，跟住就開始收拾屋企，因為要整好等人黎換水喉，幫手搬水喉體力勞動完一陣就趕返公司開會講功課，開完會又會頂frontline，開會前又比人係咁打電話黎問野，跟住成晚就係咁做，做到成11點4先交到手，跟住好攰咁返屋企訓，今朝又要六點半起身返早，真係就死，聽日全日都係預比自己休息，最少訓返餐勁既

歡送

今晚同人事部總經理食歡送飯，三圍人，d野食幾好食，3180一圍真係抵食，有原隻鮑、足料翅、大東星，其他餸都好好味，大家都食得好開心，原來暗地裏都有好多人同總經理有交情。

講返轉頭，昨天去左簽undertaking，因為有個兩日既堂budget過左8000，所以要簽一年，仲要寫住如果比公司炒都要賠，跟住同人講笑話唯有申請破產，雖然8000都唔少，但係如果係要走，8000都唔係一個有力既理由要人留低

聽日約左人開會做present，但係好多野未做，今晚都唔知要做到幾點...

影相

昨日一早就起身去左影相，見到落雨都唔係好想去，但係都報左名比左錢，都係去睇睇。估唔到去到之後，阿sir請果個model雖然睇落去好似好細個，但係都幾靚，不過落雨佢就慘d，阿sir仲有帶婚沙比佢，我都唔算成日影人，落住雨咁影人就更加少，結果都影左幾張。雨就越落越大，所以下午都無跟去影就走左

上完堂

呢兩日返左大陸上堂，上一d marketing既野，感覺都幾好，因為可以知道返一d公司近況、可以知多d唔同既tool同case、又可以有返一d聽人講野去學野既感覺。呢d咁既course應該都唔平，朝早一個tea，上兩個鐘又一個tea break，再上兩個鐘就lunch buffet，兩個鐘之後又tea break，食曲奇同牛角包都食飽人，夜晚仲要同人去食完餃子再食「蜀風樓」，兩餐加埋三個人都只係食左160蚊人仔，勁抵！之後就要自己比錢租酒店，唔算好平，但係間房都幾好，個枕頭好正好舒服！
今日都係勁食，落左堂仲要同人去小肥羊食埋野先走，五個人都係食左320人仔，比香港平左六成...

上堂

今日又好準時咁走左，因為今晚要上堂，有好多野都係未做，但係聽日又要返大陸上堂，所以好多野都要等到星期一先可以做 lu

臨走果時比人捉住開會，攪亂曬我個plan，想 book 野都 book 唔切，要麻煩人地 book 酒店，自己d野都好急咁print，好多野都好亂

今晚上第六堂，唔經唔覺就已經過左一半，但係仲係好似唔係好識游咁，唯有自己練多d，所以今晚上完堂，d同學都話不如練多陣，結果練多左45分鐘，個人好攰。不過我諗都係要學多野先叫做識識地游水

諗返轉頭，今日食完飯竟然比阿頭傳話，話有其他人提我食飯果時唔好同同事係canteen睇報紙，咁樣個感覺唔好，我「哦、得、知道」咁，比左個好平靜既反應佢，佢都好怕我唔高興，不過肯定唔係佢意思，都費事比其他反應，以後只好唔睇... 雖然唔多同意，但係無辦法 (唯有返位上網睇)

保重

今朝一早比人叫左去游水(昨晚都話唔去，所以我諗住可以勁訓)，結果諗住游完返屋企訓返夠，游完聽到朋友來電，竟然有人入左醫院，跟住就去左探朋友

原來係可能上次去camp之後，比蚊叮完之後敏感，睇到都覺得好誇張，都係要保重下身體，最少要個感冒快d好

再學

今日上第四堂，但係上次走堂，所以對於自己黎講只係第三堂，原來上次教左轉身，唔係好知做乜，但係一開始就比人叫做轉身，比阿sir話再三次，但係都唔知做乜 . ."

唔知做乜左半個鐘，跟住就學手部動作，原來手部動作係好攰好攰，企係度練都練到隻手酸曬，跟住就落水練，最後十分鐘就試下手腳協調，竟然可以學阿sir一口氣游到咁遠，雖然慢好多好多，但都總算一口氣丫，得幾個得咋，都算為上次自己係池邊練爭返口氣，哈哈...

不過個人好攰，d感冒未好，個喉嚨仲勁痛

再練

昨晚因為老闆請食飯，結果要走堂，學唔到野會比其他人拋離，跟唔上住度就大件事，所以今晚同朋友去練水，結果發現原來自己除左上次比阿sir話隻腳唔直，可能係因為大腿動作唔夠大，所以睇落去學得只係小腿發力，呢四樣野一定要改，仲要努力d自己去練多d，如果唔係就會跟唔到

勞動節

頭先去完練踼水，定間就去幫人影相，今日都係體力勞動日，哈哈...

食好野

昨晚去左食好野，主要係因為有人要去YICT，但係又係借口，哈哈... 去左三聖買龍蝦仔、生蠔同花螺，跟住去左容龍食，個牛油芝士焗龍蝦仔真係好食到好誇張，每人一隻都得，食得勁開心

最近公司都多野做左d，好多唔如意既野，做到個人越黎越燥，食完都開心曬，哈哈... 今日終於都有返d findings，終算叫做有得做下，好過之前個幾日只係硬食...

今晚仲去左第二次學游水，比阿sir話腳唔夠直、腳出左水面太多同隻手太硬，人地就可以試游，我就係邊邊度練，好似櫻木咁，一定要努力d，唔好再咁淤先得

眼前一亮

今日竟然可以比預期早走，最主要係因為客果邊個系統有問題，攪到原本聽日要行既野要改期，原本都唔想改期，但係都無辦法
返到屋企眼前一亮，地板竟然被刷到白雪雪，好似新咁白淨，感覺好舒服

放假

今日好輕鬆咁放左日假
終於裝返防毒而另一部電腦又share到internet
買左個袋
換左d卡
睇左d新既公仔書
真係好輕鬆
只不過天氣熱左d

Undertaking

今日老闆叫左去講左一陣野，話遲d有training，叫我好好珍惜，唔好「嘻嘻哈哈」咁過左個training，咁有野學我緊係會努力啦，點知佢講完之後，話第二個training因為budget高，要簽undertaking，即時表面反應當然係無問題-好呀，咁答啦，但係係內心既反應係打左個突，真係有d唔係好想去...

電腦復活

部電腦有問題左好耐，一直都無乜心機整，今日又唔舒服，所以早返屋企整電腦，又重新裝過部機，終於發現share唔到 internet access 既原因係個 NOD，真係勁奇怪，結果唔裝防毒，聽日試下第二個防毒會唔會無事先...

四月飯團

今日係停左一個月之後既四月飯團，結果亦都係食得最勁既一次
其實兩日前去左小肥羊，個肚唔係好舒服。今日都唔係好得，但係好多野都好好食，先去庸記食午餐，再去美利樓食下午茶自助餐，跟住就去左太平山餐廳食晚餐，成都都只係不停食野，食到個人好攰，睇黎都係要休養返一排先得...

搭小巴

今日遲左少少走，要搭小巴返屋企，果條小巴線有電話留位服務，結果有人係總站等無得上車，正確黎講係上左車比司機叫返落車，跟住就緊係香港人 - 勁鬧...
原意可能係好，但係總站有位都上唔到，咁又真係幾令人不快，我都見過有人係總站因為留位上唔到，但係我落車都無人再上車，結果有人係總站被拒絕上車，但係車上吉位到尾站都無人座...

昨晚終於曬左d相出黎，受他人影響，我今次都曬左好多相，有成220張，但係仲想曬多20張左右

出發

聽朝終於出發去日本，第一次去，成個大鄉里咁，好多野都未定，聽日都係上到飛機先再諗，哈哈...
公司仲有好多野未做，不過唔理，終於支持到放假，都係呢個星期盡左最大努力，盡量安排好少少d野，不過都仲有好多，可能支持到放假，心情放鬆返d，所以即刻冒感，感覺就好似以前考完試會易d病一樣，但係聽日就擔心少少，最近流感咁勁，唔知會唔會唔好彩比人捉住，聽朝都係食多兩粒藥過左境先算

東京之旅

連續幾晚都為左東京之旅不停搵料，其實真係好趕，因為唔夠兩個星期就出發，今朝個朋友好忙咁打電話搵機位，結果都係無收鑊，都幾苦惱，所以收工要出去每一間都問，好好彩咁問到新華竟然有位，又唔似得有d勁多人排隊，仲要貴，最終可以以3299座到JAL，都算係唔錯囉，因為西北都要成28xx，港龍都要30xx，呢個價座到咁有日本feel既機都幾好。

星期日曬到紅曬，呢兩日都凍返，所以攪到成塊面好乾...

江豚

今日跟左朋友去睇江豚，原來江豚係香港水域既豚科動物之一，另外一種就係中華白海豚，江豚比較怕羞，細隻過白海豚，唔會跳出水面，又唔會話一群群咁活動，所以比較難遇到，今日我地都係睇唔到，結果仲曬左成人，而家成個人紅曬...

開會

今日要開seminar既會，同組果個兩位大佬都唔黎，但係之前一日又改曬我d野，今日又要我講，我都唔係好明佢個思考模式，結果自己都唔係好清楚既情況底下要講比人聽，比人問到口啞啞，跟住聽日仲要返去同佢講返，勁無奈...

見識

今日朝早聽完鐵路主人介紹一d好吸引又刺激既野，個隊長之一話約高層食飯，問下seminar方向，咁我都唔為意，點知十二點半去搵佢地，原來係出去食，仲要去一d我無乜機會會去既地方 -- 半島，我都係第一次去，當係見識一下。高層話個roast幾好，結果佢地個個都食roast，我就無得試，結果食左個勁普通既午餐 -- 波羅豬扒炒飯，味道都好普通下，我覺得可以理得更好食。最近唔係好夠訓，結果個胃唔係好舒服，所以無試個甜品。四個人食九佰幾，都唔係話非常貴，可能我個飯真係好普通，覺得唔係好值

登山善行2006

今朝一早六點九就起身，因為要去「登山善行2006」，係果度見到曾俊華，仲見到舊同學，原來佢而家去左 ATV 做，都好似幾好，不過工作時間就長左少少。原來每個參加者都最少捐5000，所以都有唔少公司係公司組隊。

(影左張藍天白雲，但係未裝野所以upload唔到黎呢度)

Seminar

今年再次去幫手攪seminar，上年就只係幫手影相，事前唔洗做好多野，但係今年比人點左去做game team，事前要同班大佬約會問野，又有多好野都唔知，所以呢幾日(+晚)都不停做，睇黎未來兩個星期都唔好過添...

年宵

昨晚訓左上牀，跟住就記得係十五，即刻起身拆利是，今年好明顯比舊年少，最主要因為覺得再周圍去拜年好似唔係咁好，所以有好多人無比我，但係都唔算少，有成87封：
100 x 7
50 x 2
20 x 46
10 x 35

都好開心！

運動日

今日起身己經十一點幾，主要係昨晚又去左飲野
$140任飲六個鐘都幾抵，不過結果自己只係坐左兩個鐘多d
飲左四杯野就走左，但係都回左本，哈哈...

起身食完飯就好急咁去左打波，book左三個鐘，
都幾攰，主要係唔係太夠訓，不過真係要做返多d運動先得

Annual Dinner

今晚公司annual dinner，我係第一年無去，因為今年要返工，其實都無乜特別，但係今晚好似失控咁，又壞電話，又有爛櫃，又有投訴，又有無理要求，又有箱臨塔下，又有一堆文件就咁放係枱，攪到無停過，收工勁攰

休息

今日補返星期日返工既假期，聽到朋友一個壞消息，都覺得好可惜，希望好運快d再次降臨係佢身上啦！
新年之後個人都好懶，要努力搵工同做返多d運動

新年

今年新年好幾日都耐更新呢度，
主要因為部電腦之前有問題，
年廿九同年初一都係要重新裝過曬d野，
跟住一路都無去整返好部機，
今日先整返好個web site，所以先黎睇睇，
寫下新年發生既事：
年廿九：
起身就開始執屋，下午就去左打一陣機，
跟住就食團年飯 - 潮家風情 (九龍城)
跟住就返屋企開始整電腦，仲出左去行左一陣年宵
年初一：
起身就繼續整電腦，下午去左行下，
買左件新裇衫過年，夜晚繼續整機，仲去左朋友屋企吹水
年初二：
起身都已經中午，下午就去左機舖玩左一陣，
跟住就出去同舊同學食開年飯，跟住又去左飲野
年初三：
訓左三個鐘就起身去打三國，中午竟然見到有人比車撞到
跟住去左朋友屋企拜年，玩到夜晚返屋企
年初四：
返工竟然已經有十幾工開工利是，跟住仲見到之前一日，
比車撞到果個人原來偷左$75既電話繩，唉...